Home

2Korintkarank Chapter 13 - Povitr Pustok Revised - 2010

1
Atam tisrê pavtti tumchê-xim hanv ieuncho asam. Koslem-i garannem ruzu korchê khatir dogam vô tegam sakxidaranchê govaikechi goroz.
2
Tumchê modem dusrê pavtti ail’lom tednam hanvem sanglolem toxench, atam-i, tumchê modem nastana, adim pap kelam tankam ani heram soglleank sangtam; hanv porto ien zalear, hanv konnakuch xikxa lainastana ravcho na.
3
Krist mhojê sovem uloita mhonn khatri zai tumkam? Tumchêch sovem To osôkt nhoi, punn tumchê modem To xoktivônt.
4
Kiteak Taka khursar marlo tednam To osôkt aslo khorem, punn atam Devachi xokti gheun To jivo asa. Tachea ekvottant asun Tachi osoktai ami-i bhôgtanv khorem, punn Tacheach ekvottant ami jive astoleanv ani tumchea boreak Devachi xokti dokhôl kortoleanv.
5
Tumi tumchea bhavartha pormannem jietat zalear polleunk tumchich tumi chovkoxi korat. Tumchich tumi porikxa korun gheiat. Tumchê sovem Jezu Krist asa mhonn nokllot tumi? Na tôr, tumcho bhavarth sarko nhoi mhonn porikxentlean gomon ieta.
6
Punn amcho bhavarth zalear sarko asa mhonn tumkam khatri mell’llea astoli mhonn hanv patietam.
7
Ami khatreche mhonn gomun ailam ki na, hachi hanv porva korina. Tumi mat borem tem korchem mhonn Deva lagim ami magtanv. Ami khatreche mhonn disun ieunchem, ho mhozo husko nhoi; punn tumi sarkem asa tem korchem, ho êkuch mhozo husko.
8
Sotacher add vochunk amkam koslich xokti na; fokot sota khatir amkam xokti dil’li asa.
9
Ami osokt zalear zaum-di, punn tumi mat soktivont zaxat zalear ami khuxal. Tumi sudharot vechim mhonn Deva lagim ami magtanv.
10
Dekhun ozun pois astana hem hanv tumkam boroitam: hê porim tumchê-xim ietolom tednam, Somian mhaka dil’lea odhikaran khoraien tumkam vagounchi mhaka goroz poddchi na; kiteak moddun uddounk nhoi punn bandun haddunk mhaka ho odhikar dil’lo asa.
11
Atam, bhavam-bhoinnimnô, tumcho nirôp ghetam; odik-odik sudharonk vavrat; bori budh diun ekamekak dhir diat; eka monachim zaunk vavrat ani tumchê modem xantin jieiat ani mogacho ani xanticho Dev tumchê sovem astolo.
12
Khorim bhavbhoinn koxim ekamekak ixttagotichi khunna diat. Amchea bhavam-bhoinnincho nomoskar tumkam.
13
Amchea Somia Jezu Kristachi doiallai, Devacho môg ani amkam êk korun dhôrta to Povitr Atmo tumam-somestam sovem asum.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.