Home

2Korintkarank Chapter 12 - Povitr Pustok Revised - 2010

1
Vhoddvik sangun kosloch faido na; tôri hanv sangit ravtolom kiteak sangchi goroz asa, ani Somian mhaka favô kel’lea kãi dorxonanchi ani prokasnnianchi khobor kortolom.
2
Kristachea ekvottant aslolea eka mon’xak hanv vollkhotam. Chovda vorsam adim taka sorgar khud Deva mukhar ubarun vhelo: hi ubarnni mhojê kuddi soit zali vô mhojê kuddi bhair zali tem hanv nokllom Devuch zanno.
3
Hea mon’xak Vôikunttant ubarun vhelo mhonn hanv zannom: hem-i mhaka kuddi soit vô kuddi bhair ghòddlem zalear hanv nokllom Devuch zanno. Thoim mon’xachea utramnim ucharunk zainant ani zanchi gozal korunk mon’xank favona tosleô gupit vôstu tannem aikoleô.
4
Hea mon’xak Vôikunttant ubarun vhelo mhonn hanv zannom: hem-i mhaka kuddi soit vô kuddi bhair ghòddlem zalear hanv nokllom Devuch zanno. Thoim mon’xachea utramnim ucharunk zainant ani zanchi gozal korunk mon’xank favona tosleô gupit vôstu tannem aikoleô.
5
Hea mon’xak favo kel’lea onnbhova vixim vhoddvik sangunk hanv toiar asam; punn mhojêch vixim zalear, fokot hanv kitlo osôkt mhonn dakhoun ditat tea vôstum vixim vhoddvik sangtolom.
6
Oxem korun, vhoddvik sangunk sôdin zalear, hanv piso zauncho na kiteak sot tench sangtolom. Tôri oxem hanv korcho na; kiteak mhollear mhaka polleun ani mhojem aikun mhojem mol korunk zata titlench puro; hachê poros mhoje odik unch mol mhojeam oprub prokasnniank lagun konnench kel’lem mhaka naka.
7
Teach mhojea ut’tom’ prokasnniam pasot hanv gorvan fulona zaunk, mhojea angant Devan romblolo êk kantto asa: to mhaka sotaunk dhaddlolo Soitanacho êk dut; haka lagun hanv gorvan fulonk xokona.
8
Hea vixim, hea sonnsonneantlo mhaka nivar mhonn tin pavtti prarthon korun hanvem Somiak maglem,
9
punn Somian mhaka oxem sanglem: Mhoji mozôt puro tuka, kiteak osoktaient Mhojem boll sopurnnaien porzollta. Dekhun, Kristachem boll mhojê sovem vôschê khatir, bhov vhoddê khuxen mhojea osoktaianchi vhoddvik kortolom.
10
Mhonnttôch hanv osôkt mhonn, mhaka beman kelo mhonn, veg-vegllea gorzank sampoddlom mhonn, dhumallo bhôglo vô tôrê-tôrechea oddchonnimnim cheplom mhonn, porvach na: Krista pasot hê sogllê gotint hanv murgott’tam, kiteak jitlo hanv osôkt titlo hanv Kristachê xoktin soktivont.
11
Atam hanv khorench piso zalam, punn tuminch mhaka piso kela. Tumi ki mhozo man rakhunk zai aslo; hanv kãich nhoi zalear-ui, tôri tea tumchêa xrextt dhormdutam poros hanv kãich unno nhoi.
12
Tumchê modem sogllê sõsnnikaien hanv vavurtalom tednam, hanv khoro Dhormdut mhonn khatri diunk mhojê udexim Devan zaiteô khunna, ojapam ani vismitam korun dakhoilim.
13
Heram Povitr-Sobham poros koxê bhaxen hanvem tumkam kitem-i unnem kelam? Ek mat khorem, mhojea udarposonnacho bhar hanvem tumcher ghalunk na. Hi mhoji onit tumi mhaka bhôgsat!
14
Polleiat, tisrê pavtti hanv tumkam bhett diunk toiar asam, ani mhojea udarposonnacho bhar atam-i tumcher ghalcho na: kiteak tumcheô vostu mhaka nakat; tumi zai mhaka! Avoibapai pasot poixe zomoun dovrunk putam-dhuvancho kaido nhoi; portench zalear, aplea bhurgeam pasot poixe zomoun dovrunk avoibapaicho kaido.
15
Tumchê khatir mhojê kodde asa titlem-i khorchunk, mhozo jiv porian khorchunk, hanv bhov khuxi. Hanv tumcho itlo odik môg kortam dekhun, tumi mhozo unno môg korcho?
16
Borem tôr: hanvem tumcher mhozo bhar ghalunk na khorem, punn, naddbudhicho zaun, mhojê naddbudhin tumkam hanvem mhojea chopkeant dhôrlim.
17
Tumchê-xim hanvem patthoileat tea mon’xam modlea eklea vorvim tôri hanvem tumcho faido kaddla zait?
18
Tumchê-xim voch mhonn hanvem Tita kodde maglem ani tachea vangdda anink eklea bhavak hanvem dhaddlo. Titan tumcho koslo tôri faido kaddlo zait? To ani hanv ekach monan vagunk nant kai? Ami êkêch tôren cholunk nant zait?
19
Tumchê mukhar ho sogllo vêll amchem nanv rakhunk ami sôdlam mhonn chintum nakat. Na. Ami sanglam titlem Kristachea ekvottant ani Deva hujir sanglam; tumkam, priticheamnô, tumchea Kristi jivitant ghott korunk, ho êkuch aslo amcho hetu.
20
Tôri, tumchê-xim pavon tednam, mhaka tumi mell’loleat toxim mellona zaxat mhonn, ani toxench tumkam hanv mell’llolo zai aslom toso hanv mellona zain mhonn, mhaka husko asa: tumchê modem zhogddim, nattkai, rag, svarth, boglanttam, chaddiô, gorv ani gondholl-gollboll astit mhonn mhaka husko.
21
Tumchê modem novean pavtolom tednam, adim ghòddlam tench ghoddot mhonn mhaka bhirant dista: mhozo Dev mhaka tumchê mukhar lojek ghalit. Adim patkamnim jietalim tea zaitea zannam pasot mhaka khub dukam gollounk poddot mhonn mhaka bhirant dista, kiteak mhollear tãnnim ozun aplem pozoddponnachem, kamchari ani soddeponnachem jivit sôddun diunk na.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.