Home

2Korintkarank Chapter 1 - Povitr Pustok Revised - 2010

1
Paulu, Devachê khuxen Jezu Kristacho Dhormdut, ani amcho bhav Timot Korintant aslolê Devachê Povitr-Sobhek ani sogllê Akaient aslolea somest bhoktank hem potr boroitat.
2
Deva amchea Bapachi ani Somia Jezu Kristachi doiallai ani xanti tumkam favo zaum.
3
Dev, amchea Somia Jezu Kristacho Bap, sodanch doiall Bapui ani sogllea amchea gorzamnim amkam dhir-diupi: tôr Taka vakhannum-ia.
4
Sogllea amchea koxttam-dukhimnim To amkam dhir dita; hê porim ami-i, Deva koddlo amkam ieta to dhir gheun, sogllê tôrechea trasank sampoddloleank dhir diunk xoktanv.
5
Zoxem Bap amkam Kristachea koxttamnim bhorpur vantto dita, toxench To amkam Krista udexim bhorpur dhir-ui dita.
6
Ami attevitte kaddtanv? Tôr te tumkam dhir ani soddvônn mellchê pasot. Amkam dhir mellta? Tôr ho-i tumkam dhir mellchê khatir. Oxem ami bhôgtanv tech koxtt-dogd tumi-i thirponnan bhôgunk pavtoleat.
7
Tumchê vixim amcho bhorvanso thir, kiteak koxttam-dogdamnim amchim bhagidaram zaun, dhirant-ui tumi amchim bhagidaram zatoleat mhonn ami zannonv.
8
Bhavam-bhoinnimnô, Aziechea prantant kede ami upodre-koxtt bhôgleat, tem tumi zanno zal’lim mhaka zai: kitlo zôdd bhar amcher poddlo! To amchean sõsum nozo titlo! Tea upodream-koxttantle ami jive utortoleanv mhonn amkam bhorvansoch naslo.
9
Khorench, mornnachem formonn amcher poddlem-xem amkam dislem; ami koxêch bhaxen amcher patiena zaunk hem oxem ghòddlem: fokot Devacher ascho sogllo amcho visvas, kiteak mel’leank porian jivont korunk Taka tank asa.
10
Mornnachea iedea vhodda sonkottantle Tannem amkam nivarle, ani hea fuddem-i To amkam nivartolo mhonn amcho bhorvanso.
11
Tumchea-i magnneancho amkam adar mellum; oxem zaitea zannanchea magnneamnim Devan amkam kela tea upkara khatir zaitim zannam amchea nanvan Taka dhin’vastolim.
12
Soglleam kodde, punn bhovkorun tumchê kodde vagtana, amchi chal sodanch, Devak zai toxi, promannikponnachi ani sadeponnachi zali; hantum mon’xachê zannvaiecher patieun nhoi, punn Devan funkea dil’lea denneachê podvecher patieun ami chol’leanv. Hachê pasot amkam obhiman bhògta ani hem tumkam khatren sangtanv.
13
Amchea boroupant tumkam spoxtt vachunk zaina ani sarkem somzunk mellona toslem kãich ami tumkam boroinanv.
14
Zoxem tumi ozun porian amchi chal ili-ili somzunk pavleant, toxench tumi ti sarkich somzunk pavtoleat mhonn bhorvanso ballgitam; oxem, amchea Somia Jezucho Dis ietolo tednam, zoso tumchê khatir amkam obhiman bhògta, tosoch amchê khatir tumkam-i obhiman bhògtolo.
15
Hea soglleachi khatri mhaka asli dekhun, hanv poilim tumchê-xim vochunk ani oxi tumkam dupêtt khuxalkai diunk sôdtalom.
16
Mhonngê, mhoji ievzônn oxi asli: tumchea ganvantlean Masedoniek vochunk ani Masedoniê thaun portun ietana novean tumchê-xim ieunk; magir, vattek goroz to adar tumchê koddlo gheun, Judeiak vochunk ievjitalom.
17
Oxi mhoji ievzônn asli mhonnttôch, hanvem ti voilea-voir bodôl’lea mhonn dista tumkam? Vô mhojea mon’xasoimbak avoddta tem polleun, mhojeô ievzonneô kortam ani mhojea monant borabôr Hôi, hôi ani Na, na asa mhonn somzotat tumi?
18
Zoso Dev dil’lem utôr visvaxiponnan pallta, toxem amchem utôr tumkam borabôr Hôi ani Na, oxem zaunk na.
19
Hanvem, Silvanan ani Timotan tumkam porgôttla to Devacho Put, Jezu Krista, borabôr HÔI ani NA oso kednanch zalo na; To sodanch HÔI.
20
Kiteak Devan keleat titleô-i bhasavnniô Tachê sovem HÔI zaleat, ani heach pasot Tachê vôrvim Devak mhoima diunchê khatir ami AMEN a mhonnttanv.
21
Khud Devan amkam ani tumkam borabôr Jezu Krista sovem ghott rigoun dovorleant; Devanuch amkam Aplê sevek makhleat,
22
ani ami sogllim Tachim mhonnun amcher Tannem Aplo xik’ko marla, ani isaro zal’lê porim Tannem amchea kallzamnim Atmo ghala.
23
Mhojea jivachean sangtam, hanv novean Korintak vochunk na zalear, hachem karonn ekuch: tumkam anink dukh dina zaunk; hacho govai Dev.
24
Khorench, tumchem bhavarthachem jivit zobordosten cholounk amchem mon nhoi, tumcho sontôs vaddounchea monan tumchê borabôr vavrunk amchi khuxi; kiteak tumchem bhavarthachem jivit thir.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.