Home

2Juanv Chapter 1 - Povitr Pustok Revised - 2010

1
Hanv, Vhoddil, Devan vinchun kaddlolê Ostoriek ani tichea bhurgeank noman kortam. Tumcho hanv khoreponnim môg kortam; hanvuch nhoi, punn sot vollkhunk pavleant tim sogllim.
2
Amchê sovem riglolem asa ani sasnnak amchê sovem rigun ravtolem tea sota khatir tumcho ami oso môg kortanv.
3
Sota pormannem ani mogan zôr ami jieleanv, Deva amchea Bapachi ani Bapachea Puta Jezu Kristachi doiallai, konnvallai ani xanti ami sodam bhôgunk pavtoleanv.
4
Bapa koddchi zoxi ami adnia ghetlea, toxim sota pormannem tujim bhurgim choltat mhonn polleun, mhaka khub anond bhòglo.
5
Tujê lagim ekuch magtam: ekamekacho môg korum-ia. Oxem tuka boroun, Bai, êk novi adnia tuka dina, punn orombak amkam dil’li tich adnia.
6
Môg korop ani Tachea adniam pormannem cholop mhollear ekuch; orombak thaun tumi hi adnia aikolea: tichê pormannem cholum-ia.
7
Jezu Krist mon’xasoimb gheun ailo mhonn mandun ghenant tosle zaite fosovpi sonvsarant ximpoddleat. Fosovpi mhonnlolo, Krista-Virodhi mhonnlolo - hech te!
8
Chotraien cholat, na zalear sogllo tumcho vavr nirfôll zatolo ani tumkam purnn inam’ mellchem na.
9
Jim konn Kristachê xikovnnechea ximam bhitôr ravonant, punn tea-vôn pelean vetat, tanchê sovem Dev na. Jim konn Tannem xikoilam tem samballtat, tanchê sovem Bap ani Put asat.
10
Veglli kosli xikovnn gheun konn-ui tumchê modem ietit zalear, tankam tumchê-xim gheum nakat, ani tankam noman legun korum nakat.
11
Tumi osleank noman korxat zalear, tanchea noxttea kortubamnim tumi tanchim bhagidaram zatat.
12
Tumkam zaitem sangchem asa, punn kagdar ani xaien korchem nhoi mhonn mhaka dislem. Punn tumchê-xim ietolom ani tumchê lagim tondda-tonddim uloitolom mhonn mhaka bhorvanso asa, ani oso amcho sontôs sopurnn zatolo.
13
Devan vinchun kaddlolê, tujê bhoinnichim bhurgim tuka noman kortat.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.