Home

1Timotak Chapter 6 - Povitr Pustok Revised - 2010

1
Jea mon’xanchê manir gulam’ ponnachea bhesachem zum asa, tea somestamnim apleam dhoniank sogllo man favo mhonn somzun cholchem; toxem kelear Devachea nanvachi ani amchea xastrachi konnuch ninda korunk pavchim nant.
2
Dhoni amchea bhavarthacho zalear, to aploch bhav mhonn nib gheun gulamamnim tachi beporva korchi nhoi; urfattim tãnnim odik vhoddê zotnaien tachi seva korchi, kiteak gulamanchê chakrecho adav kaddtat tim teach bhavarthachim ani mogachim bhavbhoinn. (2b)Hanvem sanglam tem xikoi ani pallunk lai.
3
Konn-konn vegllem kitem xikoitat ani Jezu Kristachi, amchea Somiachi, osôl xikovnn ani Devachê khorê bhoktik pavoita tem xastr manun ghenant.
4
Oslim mon’xam gorvan ful’leant ani sarkim nennar. Tancho sobhav oso ki kitea-i vixim vad-vivad korinastana ani utram dhôrun zhogddim korinastana tanchean ravum nozo. Dekhun tankam nattkai bhogta, tim zhogddim manddtat, ekamekak okman kortat, ekamekacho dubav dhôrun bhonvtat,
5
thambonastanam vad kortat. Osleank budh-ginean na, sotachi vollokh-ui na. Devachi bhokti korun apnnank khub girestkai melltoli mhonn somzotat.
6
Devachi bhokti korun apnnank mell’llam titlean mon’xam dhadoxi zatat zalear, Devachê bhoktin tankam khoreponnim khub girest keleant mhonnchem.
7
Sonvsarant ietana kitem ami gheun aileanv? Kãich nhoi! Sonvsar sôddun vetanam kitem tori ami gheun vetoleanv? Kãich nhoi!
8
Mhonnttôch amkam jevunk-khaunk ani nhesunk-pangrunk aslear, itlean ami dhadoxi zaunchem.
9
Girest zaunk sôdtat tim tallnnek ani devcharachea fasak sampoddtat, kiteak nirbudhi ani noxttadik vondovnniô tankam oddun vhortat; osleô vondovnniô mon’xank nisonttonak ani ghorttannak pavoitat.
10
Sogllea vaittanchem mull mhollear girestkaiechi axa; osli axa dhôrun, kãi zannam bhavartha thaun koddsorun geleant ani oxem sobar koxtt-dogd aplea mathear tãnnim oddun haddleat.
11
Punn tum, Devachea bhokta, osleô vostu sôddun di. Sodam Devak manovlolo zaunk tujem dhean-mon lai; Tachi khori bhokti korit rav; bhavartha pormannem chol ani bhavam-bhoinnincho môg kôr; koxttam-dogdank sõsnnikaien fuddo kôr; soglleank dulobaien vagoi.
12
Bhavarthachem zhuz sôddum naka, Sasnnik Jivit zôddun ghe, tôr sobar govaiam mukhar tunvem bhavarthachem ut’tom’ ucharonn kelãi tednam, hench jivit zôddunk Devan tuka apoila.
13
Soglleak jivprann dita tea Deva mukhar ani Pons Pilata hujir govai diun ut’tom’ ucharonn kelam tea Jezu Krista mukhar hanv tuka oso hukum’ ghaltam:
14
Jezu Krist, amcho Somi, dobajean dixtti poddo-sôr, chuki virêt ani guneanv nastana tuje kaide pall.
15
Apnnem nemlolea kallar Taka porgôtt kortolo
16
Ekloch omôr asa To, ogom’ uzvaddant ravpi, mon’xan polleunk naslolo, polleunk-ui zaina toslo, Ekloch sogtta-sorvancho Bhagevont Odhikari! Toch to razancho Raza ani dhoniancho Dhoni! Taka man ani odvi sasnnachea sasnnak! Amen!
17
Hea sonvsarachi girestkai asloleank oxem xikoi: tumi gorvan fulom nakat ani othir girestkaiancher tumcho bhorvanso dovrum nakat. Tumcho bhorvanso fokot Devacher asum-di, kiteak To amchea gorzank zai titlem-i bhorpur mapan amkam dita.
18
Borem tem korat, borea kornniamnim girest zaiat, udar kallzan herank vanttun diat: oxem tankam sang.
19
Oxem korun tim aplea fuddarak omolik bhanddarachi ghôtt buniad ghalun dovortolim, ani hê porim ekuch khorem Jivit asa tem apnnank zôddunk pavtolim.
20
Timot mhojea pritichea, tujê adhin kela to tthevo rakh; Devachê bhokticher add ani ôrth-naslole vad-vivad vattai; osle vad-vivad konn-konn zannvai mhonn somzotat, punn khorench mhollear tantum zannvai bilkul na.
21
Osli polki zannvai dhôrun kãi zannamnim bhavarthuch sôddun dilo. Devachi doiallai tumam-somestam sovem asum.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.