Home

1Timotak Chapter 2 - Povitr Pustok Revised - 2010

1
Sogllea adim hanv magtam tem hem: somest mon’xam khatir prarthonam korat magnnim, vinoti ani dhin’vasnni;
2
Devachi bhokti ami purnntaien korchê khatir ani soglleam modem favo ti moriad ami samballchê khatir, xantin ani sovostkaien jieunk amkam mellchem mhonn, razam ani odhikariam pasot magat.
3
Oxem korun ami borem kortanv ani hem Devak, amchea Soddvonnarak, man’ta.
4
Sogllea mon’xank soddvônn diunk Devachi khuxi, ani somestank purnn sotacho onnbhôv mell’llolo Taka zai.
5
Hem sot mhollear oxem: Dev êkuch, ani Devak ani mon’xank ekameka lagim haddunk Ekloch asa: To mhollear Jezu Krist. Jezu khoro monis,
6
ani somestanchê soddvonnechem mol mhonnun Tannem Apnnachench somorponn kelem. Hem Tachem iukt vellar kel’lem bolidan Devak somestanchi soddvônn zai mhonn sakxi dita.
7
Ho nirôp porgôttunk ani videxiank khoro bhavarth xikounk Devan mhaka Dhormdut nemlo; sot tem uloitam, fôtt sangina.
8
Dekhun veta thõi dadleamnim khorê bhoktin magnnem kel’lem mhaka zai; punn hat ubarun magnnem kortat tednam, tanchea kallzant kosloch rag ascho nhoi ani sogllo vad-vivad sôddcho.
9
Toxench bailamnim tankam sobta tê bhaxen moriadin ani mannsugen nhesun ieunchem; mudialle kens korche nhoi; bhangar-xringar, mannkam-motiam ani unch molachim vostram ghalun ieunchem nhoi.
10
Bhoktivont bailank sobta toslo, borea kornniancho zaum-di tancho xringar.
11
Zap kaddinastana, sogllê nomrutaien bailen xikovnn gheunchi.
12
Xikovnn diunk vô dadleacher odhikar cholounk hanv bailek rojia dina. Ti ogi ravchi.
13
Kiteak Devan Adanvak poilo rochlo, magir Evek;
14
ani Adanv fosovlo na, punn bail ki fosovli ani Devachi adnia tinnem môddli.
15
Bhurgeank zolma haddun ti soddvônn zôddtoli; teach borabôr moriad samballun ti bhavarthant, pritimogant ani bhoktint thir ravchi.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.