Home

1Timotak Chapter 1 - Povitr Pustok Revised - 2010

1
Hanv Paulu, Jezu Kristacho Dhormdut: Deva amchea Soddvonnarana ani Zacher ami bhorvanso tthevtanv teach Jezu Kristan mhaka Dhormdut nemla;
2
ani tum, Timot, bhavarthant mhozo put zalai. Deva amchea Bapachi ani Jezu Krista, amchea Somiachi, doiallai, konnvallai ani xanti tuka magtam.
3
Hanv Masedoniek vetalom tednam tuka hanvem sanglolem toxem, tum Efezantuch rav. Thõi kãi zannam khotti xikovnn ximpddaitat; tankam tunvem bond korchim.
4
Toxench, polkea kanniancher ani purvozachea vonxa-vollincher dhean-mon dovrun vêll ibaddinakat mhonn tankam sang. Oslea vostumnim polke vivad mat upzotat; Devachi ievzônn fuddem vhorunk te vivad kiteakuch upkaronant, kiteak hi ievzônn fokot bhavartha vorvim fuddem veta.
5
Mhojê xiddkavnnecho hetu ho: xud’dh kallzantlo, nitoll ontoskornnantlo ani osôll bhavarthantlo upzota toslo pritimôg amchê modem vaddounk.
6
Kãi zannam hem sogllem sanddun ani dusri vatt dhôrun naka zal’lea vivadank sampoddleant.
7
Oslim mon’xam Somurt xikounk fuddem sortat, punn sangtat tem apunnuch somzonant, ani aplench khorem korunk sôdtat, tachê-i vixim, tim kãich nokllot.
8
Somurt bori mhonn ami sogllim zannonv, punn ek mat gorjechem: ticho favo to upeôg korunk zai.
9
Kaide borea mon’xam pasot rochlole nant mhonn monant dhôrchem; te odhormi ani fotting mon’xam pasot, dev-dhorm nasloleam ani patkiam pasot rochleat; toxench bhoxttavnneam ani povitr vostunchi bhidda naslolea mon’xam pasot; avoibapaicho prann ghetolea ani heram khuniam pasot;
10
soddeam ani apleach lingachea mon’xam kodde pozoddponn kortoleam pasot, mon’xank ubarun vhortoleam pasot, lobaddiam ani lottik soput ghetolea mon’xam pasot, ani rokh-borea xikxonnacher koxê-i bhaxen add vetoleam pasot.
11
Hem rokh-borem xikxonn mhollear ami vornnitanv tea Devachea mhoimêbhorit Xubhvortomana pormannem asa tem, ani hem Xubhvortoman Devan mhojê adhin kelam.
12
Jezu Kristak, amchea Somiak, hanv dhin’vastam, kiteak mhojê adhin kel’lea kamak Tannem mhaka boll dilem. Mhaka khatrecho mhonn dhôrun, Aplê sevek Tannem mhaka nemlo.
13
Jezuchi hanvem adim ninda kel’li, Taka dhumallo dil’lo ani Taka okman kel’le. Tori Devan mhoji kaklut keli, kiteak mhaka bhavarth naslo tednam nokllo zaun hanvem toxem kelem;
14
ani mhojea Somiachi doiallai mhojer ufallun aili, ani Jezu Kristachea ekvottant jietoleanchi mhaka mell’lli bhavarthachi ani bhavam- bhoinninchea pritimogachi bhorti.
15
Sogllê khatrechi ani soglleamnim manun ghevpachi sangnni hi: Jezu Krist patkiank soddvonn diunk hea sonvsarant ailo, ani tea patkiantlo poilo patki hanv. Punn mhaka kaklut mellunk karonn hem:
16
Somia Jezun soglleam- vôn chodd mhojê sorim Apli xim’-mer nasloli sõsnnikai dakhounchê khatir, Devan mhoji kaklut keli; hê bhaxen Sasnnik Jivit zôddunk jim konn Jezucher bhavarth dovorchim aslim, tankam hanv êk nomuno zaunk zai aslom.
17
Dekhun kallam-iuganchea Raiak, ovinaxi ani amkam disonaslolea ekleach Devak, man ani mhoima sodam-sorvoda ! Amen!
18
Timot, mhojea puta, tujê vixim provadiamnim ucharlolea utram pormannem, tuka oso updês ditam: tanchea uzvaddan boro soinik koso tunvem zhuzchem;
19
bhavarth ani nitoll ontoskornn tujea zhuzachim hatiaram zaunchim. Aplem ontoskornn kuxin kaddun dovorlem dekhun, kãi zannam, tanchea bhavarthachem tarum futtun, buddlim.
20
Tanchê modem Himenêv ani Aleksandr; Devninda korchi nhoi mhonn tankam gomun ieunchê khatir, tankam hanvem Soitanachê adhin keleat.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.