Home

1Thesalonikarank Chapter 5 - Povitr Pustok Revised - 2010

1
Bhavam-bhoinnimnô, hem kednam ani khoinchê ghoddier ghòddtolem tê vixim ami tumkam borounchi goroz na.
2
Kiteak chôr zoso ratcho ieta, toso Somiacho Dis ietolo mhonn tumi bêsborim zannont.
3
Sogllem xant asa, koslich bhirant na! oxem mhonnttat thoinch astana, ravonaslolem nisontton tancher ietolem: zoxeô ballonteracheô dukhi êkê gorbhest bailecher okosmat ietat, toxem tem nisontton pavtolem, ani tantlo konnuch suttcho na.
4
Punn to Dis chôr koso ieun tumkam sampddaunk, tumi, bhavam-bhoinnimnô, kallokhant nant;
5
tumi sogllim uzvaddachim mon’xam, disachim mon’xam; ami ratichim ani kallokhachim mon’xam nhoi.
6
Mhonnttôch, heram mon’xam bhaxen ami nhidun aschim nhoi, punn zagrut ravum-ia ani sogttant moriad samballum-ia.
7
Nhidtat tim ratchim nhidtat, ani bebdikai kortat tim ratchi bebdikai kortat.
8
Punn ami disachim mon’xam ani amchem jivit moriadichem zaunchem. Amchi chhati rakhpachem hatiar zaum-di amcho bhavarth ani pritimôg; toxench tokli rakhunk amchem xirastronn zaum-di soddvônn zôddpacho amcho bhorvanso.
9
Kiteak ami Aplea krodhak sampoddchim mhonn nhoi, punn amchea Somia Jezu Krista udexim ami soddvonn zôddchi mhonn amchê sorim Devachi ievzônn.
10
Jezu ietolo tednam ami mel’lim vô ozun jivim asum, Tachea ekvottant ami jieunchê khatir To amchê pasot melo.
11
Mhonnttôch, zoxem tumi korun aileant, toxench ekamekak dhir diat ani ekamekacho bhavarth ghôtt korunk vavrat.
12
Bhavam-bhoinnimnô, tumchê modem koxtti vavr kortat ani Somiachea nanvan tumchê vôir odhikar choloitat ani tumkam bori budh ditat tanchi bhidda dhôrat;
13
Tanchea vavrak lagun tankam vhôdd man ani opurbai dakhoiat. Tumchê modem xantin cholat.
14
Bhavam-bhoinnimnô, xist nasloleank xiddkaiat, bhezuddank dhir diat, osoktank boll diat, soglleam sorim sõsnnikaien cholat.
15
Konnench dusreak vaitt vaittan farik korina zaunk chotrai dhôrat, punn zata titlem borem korat, zaum tumchêch modem ekamekak, zaum soglleam heram mon’xank.
16
Sodanch khuxal ravat.
17
Thambonastana magnnem korat.
18
Ani khoinchê-i poristhitint argam diat, kiteak Jezu Krista sovem oxem korun tumi Devachi khuxi palltat.
19
Povitr Atmeache vôrgunn addaum nakat vô ibaddum nakat.
20
Provadianchea sondexachi beporva korum nakat;
21
punn sogllem topasun kaddun, kitem borem tem ghott samballat.
22
Sogllê torechem vaitt pois korat.
23
Xanti dita to Dev tumkam sopurnnaien povitr korum; ani Jezu Krist amcho Somi ietolo tea Disak tumchem ak’khem jivit otmea-kuddi soit To chuki virêt samballum.
24
Tumkam apoileant To Apunnuch hem kortolo, kiteak To visvaxi.
25
Bhavam-bhoinnimnô, amchê-i pasot magat.
26
Sogllea bhavam-bhoinnink tumchea mogachi khunna diat.
27
Hem potr somest bhavam-bhoinnink vachat mhonn Somiachea nanvan hukum’ ghaltam.
28
Amchea Somia Jezu Kristachi doiallai tumchê sovem asum.

Golden Verse

Samuelachem Dusrem Pustok 17:18

Toripunn eka chakran tankam pollele ani Absalanvak kollit kelem. Oxem astam-i tãnnim dogamnim-i pollapôll kaddli ani Bahurimant ravpi eka mon’xachea ghora-xim pavle. Tachea angnnant êk bãi asli. Te tantum bhitôr denvle.