Home

1Thesalonikarank Chapter 1 - Povitr Pustok Revised - 2010

1
Paulu, Silvan ani Timot Deva amchea Bapachea ani Somia Jezu Kristachea ekvottant asa tê Tesalonikechê Povitr-Sobhek noman kortat. Devachi doiallai ani xanti tumchê sovem asum.
2
Thambonastana amchea magnneamnim tumcho ugddas korun, tumam-somestam pasot ami sodanch Devak dhin’vastanv.
3
Tumcho bhavarth kornniamnim tumi dakhoilo, koxtt korun mogan tumi vavurleant, ani Krista amchea Somia Jezucher bhorvanso dovrun tumi thir ravleant; hem amchea Deva ani Bapa mukhar amchea monant ghott asa.
4
Mhojea bhavam-bhoinnimnô, tumi Devachê opurbaiechim ani Tannem tumkam Aplim zaunk vinchun kaddleant mhonn ami zannonv.
5
Ami tumkam Xubhvortoman porgôtt kelam: tem fokot utramnim nhoi punn Povitr Atmeachea bollan kel’lea khunnamnim; tea vellar hea Sondexachi amchi purnn khatri-i ami tumkam dakhoili. Ani tumcheach boreak tumchê modem ami koxe chol’leanv tem tumi borim zannont.
6
Tumchê pallien tumi amchi ani Somiachi dêkh ghetli ani Devachem utor sobar koxttam-dogdam modem Povitr Atmeachê khuxalkaien tumi oxem manun ghetlem,
7
ki Masedonient ani Akaient sogllea bhavarthiank tumi êk nomuno zaleant.
8
Hôi, tumchê koddsun Somia vixim sondêx gazot gelo; fokot Masedonient ani Akaient nhoi, punn sogllê kodden tumi Devacher bhavarth dovorlo mhonn khobor pavli; dekhun hachê vixim ami kitench sangchi goroz na.
9
Tumi kitlo boro ievkar amkam dilo, ani jivea ani khorea Devachi chakri korchê khatir koxim tumi kuddea devank sanddun Deva-xim vollon aileant, hê vixim toch lôk uloit asa;
10
ani Tannem mel’leantlo punorjivont kela ani sorgar thaun ieuncho asa tea Jezuchi, Tachea Putachi, tumi vatt polleun asat mhonn toch lôk sangta. Toch Jezu amkam ieuncho asa tea krodhantlim nivarta.

Golden Verse

Dusri Somurt 21:5

Leviche iadnikui thoim vetole, kiteak zobordos-teche soglle prosn tãnnim tharaun gheunk zai. Sorvesporan tankam aplê sevek, ani aplea nanvan axirvad ghalunk vinchun kaddleat.