Home

Samuelachem Poilem Pustok Chapter 1 - Povitr Pustok Revised - 2010

1
Ramathaim’ ganvant Sufitanchea kullantlo, konn-êk dadlo aslo; to Efraimachea dongri ganvant ravtalo; tachem nanv Elkanah. To Jerohamacho put; ho Elihucho put; Elihu Tohucho put; Tohu Sufacho put, ani ho ganvan Efraimacho.
2
Taka dogi bailô asleô: êkêchem nanv An’na ani dusrêchem Penin’nah. Penin’nah-ak bhurgim aslim, punn An’nak naslim.
3
Tancho ghorkar vorsachea vorsa Dolbharanchea Sor-vesporak bhôzunk ani iôdn bhettounk aplea nogrant thaun Shilo b  dongrar vetalo; thoim Eliche dogui put, Hofni ani Fineias, Sorvesporache iadnik koxe Tachi seva kortale.
4
Elkanah aplo iôdn bhettoitalo tea disa, Penin’ak ani tichea bhurgeank hea iodnantle zaite vantte ditalo;
5
punn, zôr-ui to An’nacho chôdd môg kori, tor-ui to tika êkuch vantto ditalo, kiteak Sorvesporan tika bhurgem diunk naslem.
6
An’nak Sorvesporan bhur-gem diunk na dekhun, tichi virodhi tika kikont korunk bogor-bogor tika sotaitali.
7
Ani oxem vorsachea vorsa ghòdd-talem; Sorvesporachea Mondirant vetat titlê-i pavttim, oxi ti An’nak sotaitali. Hea pasot An’na roddtali ani kãi jei-khaznasli.
8
Tedna Elkanah, tichea potin, tika mhollem, ‘An’na, tum kiteak roddtai ani kiteak jei-khainaim? Itli khontint tum kiteak buddleai? Dha bhurgeam poros hanv tuka chôdd molacho nhoi?’
9
Shilo nogrant jevlea-khelea uprant An’na thoinsorli utthli; Sorvesporachea Mondirachea Darar Eli bosun aslo;
10
tedna sogllich khontibhorit zaun ani dukham golloun, An’na Sorvesporak prarthon korunk lagli.
11
Ani oxi tinnem êk angovnn keli, ‘Dolbharanchea Sor-vespora, tujê chakorniche choddfodde polleun ticho ugddas kortai ani ticher visôr ghalinaim zalear, punn tujê chakor-nnik êk put zolmo-so korxi zalear, hanv taka ak’khea tachea jivitak Sorvesporak bhettoitolim ani kednanch tachea matheak vakôr launk diunchim na.’c
12
Sorvesporachea mhoreant ti oxi zaito vêll prarthon korit astana, Eli tichea tonddak polletalo.
13
An’na ekdom’ lhu-van uloitali: tiche onttuch haltale, punn utram aikum ienaslim. Dekhun taka ti pielea-xi disli d 
14
ani tannem tika mho-llem, ‘Kitlo vêll mhonn tum oslea piel’lea bhesar ravtolii? Tuzo soro tum sôdd.’
15
Punn An’nan zobab dilo, ‘Na, Saiba, hanv êk dukhi-khontik sampoddloli bail; hanvem soro, na mhonn koslench her pivonn, chakunk na; punn mhojea kallzak bhògta tem hanv Sorvesporak sangtalim.
16
Hanv êk tosli holki bail mhonn dhorinaka; ho sogllo vêll hanv khontim-huskeamnim bhòrlolea kallzant thaun uloitalim.’
17
Tedna Elin mhollem, ‘Xantin voch ani tunvem Israelachea Deva kodde prar-thun maglãi tem To tuka dium.’
18
Ti-nnem taka portipall kelo, ‘Tujea dolleam mukhar tujê chakornik upkar mellum.’ Oxem uloun ti aplê vattek lagli ani jevli ani tichem mukh anink kednanch khontin bhòrlolem disunk na.
19
Bhov sokallim tim utthlim ani Sorvesporak bhôzun aplea ganv-ghora Rama nogrant portolim. Elkanah hannem aplê bailê An’na kodde kuddicho ekvott kelo ani Sorvesporan tichea magnnea-cho ugddas kelo.
20
Ti gorbhest zali ani, dis bhòrlea uprant, tinnem eka putak zolm dilo ani Samuel mhonn taka nanv dovorlem, kiteak, tinnem mhollem ‘hanvem taka Deva kodde magun ghet-la.’
21
Eka vorsa uprant, ticho ghôv Elkanah sogllea aplea kuttumba borabor Sorvesporak aplo vorsavollicho iôdn bhettounk ani apli angovnn pallunk novean choddun gelo.
22
Punn An’na geli na; tinnem aplea ghovak mhollem, ‘Bhurgeachem dud tôddchê adim hanv vechim na. Uprant hanv taka gheun vetolim ani Sorvesporak bhettoitolim ani to sodankal thoinch ravtolo.’
23
Tedna Elkanah tichea potin zobab dilo, ‘Tuka borem lagta toxem kôr. Bhurgem dud soddi porian tum ghorach rav. Sorvespor ghoddiek tuji bhasavnni purnn korit.’ Mhonnttôch, An’na bhurgeak sambhallunk ghora ravli.
24
Samuelachem dud tôddlea uprant, An’nan apnna borabor tin vorsancho paddkulo, êk map-bhôr pitt ani battli-bhôr dakam-rôs gheun, taka Shilo ganvant Sorvesporachea Mondirant vhelo; bhurgo ozun dhakttuloch aslo.
25
Tãnnim paddkuleacho iôdn kelo ani bhurgeak Eli-xim vhelo.
26
Tinnem mhollem, ‘Saiba, Sorvespora kodde prarthon korit tujê-xim asli ti bail hanvuch mhonn soput gheun sangtam.
27
Hanv magtalim to hoch bhurgo; ani hanvem maglolem tem Sorvesporan mhaka favo kelem.
28
Tachem sogllem jivit hanv atam Sorvesporachêch adhin kortam.’ Ani taka Sorvesporachê sevek thoinch dovrun ti geli. Uprant thoim tãnnim aplim magnnim kelim.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.