Home

1Pedru Chapter 1 - Povitr Pustok Revised - 2010

1
Hanv Pedru, Jezu Kristacho Dhormdut, Pontusachea, Galasiechea, Kapadosiechea, Aziechea ani Bitiniechea prantamnim ximpoddlolea bhavam-bhoinnink noman kortam. Tumi tumchea khaxa desa thaun pois asloli, Devan vinchloli, vattsur porza.
2
Aplê sasnnik ievzonnen Devan, amchea Bapan, tumkam Aplim zaunk vinchun kaddleant; Aplo Atmo tumkam diun Tannem tumkam povitr keleant; Jezu Kristak khaltim zaun, Tannem vikrailolea rogtan tumchim patkam dhuun gelim. Devachi doiallai ani xanti chodd ani chodd tumi bhôgunk pavum mhonn hanv magtam.
3
Devak, amchea Somia Jezu Kristachea Bapak, sodanch vakhannum-ia! To amcho chôddchôdd môg korta dekhun, Jezu Kristak mel’leantlo punorjivont korun Tannem amkam novo zolm dila. Oxem amkam atam kodinch sorona toslo bhorvanso asa:
4
mhonngê Devan Aplea bhurgeank bhasaun dovorlolem Jivitachem daiz gheunk ami ravtanv. Hem daiz Tannem tumkam sorgar samballun dovorlam: tem kodinch padd zaunchem na, tem sodankal sundor-sobit urtolem, tachem mol kednanch ubun vechem na.
5
Tumi bhavarthan Jezuk manun ghetat dekhun, Dev tumkam Aplê podven rakhun dovorta. Oxem tumkam toiar kel’li soddvonn bhôgunk tumi axeun ravtat. Kallachea xevottak To ti tumkam ugddapi kortolo.
6
Mhonntôch khuxal ravat. Atam matso vogôt jin’sam-jin’sanche upodre tumi bhôgche poddlear poddum-di; kiteak tanchê vorvim tumchea bhavarthachem mol gomun ieta.
7
Sodam togona tem bhangar porian ujeant ghalun topastat; toxench hal-upodreamnim tumchea bhavarthachi topasnni zata. Ani jednam Jezu Krist dixtti poddtolo, tednam tumkam melltoli vakhann’nni, mhoima ani bhovman.
8
Tumi Taka polleunk na, tori tumi Tacho môg kortat; tumi ozun Taka pollenant, tori Tacher tumi bhavarth dovortat. Dekhun tumi itlê ut’tôm’ khuxalkaien bhòrleant ki ti vornnunk utram melloch nant.
9
Ani hea tumchea bhavarthachem sopurnn foll, mhonngê tumchem purnn taronn, tumkam melltolem mhonn tumkam khatri asa.
10
Heach taronnak provadi ravtale ani tem koxem zôddchem tem te sôdit asle; ani Dev tumkam diuncho aslo tea dennea vorvim tãnnim adim-fuddench bhakitam kelim.
11
Kristacho Atmo provadiam sovem aslo ani Kristan koxtt sõsche asle ani uprant Taka mhoima mellchi asli mhonn teach Atmean tankam adinch sanglolem. Hem sogllem kednam ani koxem ghòddtolem aslem tem provadi sôdun kaddunk vavurle.
12
Te porgôtt’tale to sondex apleach faideak nhoi, punn tumchea faideak mhonn Devan provadiank kollit kelem. Ani jem kitem tãnnim sangun dovorlem, tench atam Xubhvortoman porgôttlam tea mon’xamnim tumkam uktem kelem. Hem Xubhvortoman porgôtt’tana Devan sorgar thaun dhaddlolo Povitr Atmo tanchim monam uzvaddaitalo. Devdut legun hea vostunchi vollokh axen gheunk sôdtat.
13
Dekhun tumchim monam sarkim mekllim korun aitim ravat, ani Jezu Krist dixtti poddtolo tednam jem soddvonnechem dennem tumkam melltolem, tacher purnn visvas tthevat.
14
Devachim khaltim-pallok bhurgim zaiat, ani tumi sot vollkhonasleat tednam tumi tumchea vondovnniam pormannem choltaleat toxem atam korum nakat.
15
Portench, sogllê tumchê chalint povitr zaiat, kiteak Zannem tumkam apoileant To povitr;
16
oxench Povitr Pustok sangta: Hanv povitr dekhun tumi-i povitr zaiat.
17
Omko vô tomko mhonn pollenastana zonn-ekleachea kornniam pormannem zonn-ekleachi nit korta Taka tumi Bapa mhonnun ulo martat; dekhun hea pordesant jietana Tachi khori bhokti korun cholat.
18
Tumi tumchea purvozam koddchi polkea jivitachi chal ghetloli; tê chalintlim Devan tumkam soddoileant, nhoi koslêch vinaxi vostu vorvim, nhoi mhonn rupea vô bhangara vorvim, punn nixkollonk ani khotavinn Menddreachea, mhonngê Kristachea, omolik rogta vorvim: hacho ugddas dhôrat.
19
Tumi tumchea purvozam koddchi polkea jivitachi chal ghetloli; tê chalintlim Devan tumkam soddoileant, nhoi koslêch vinaxi vostu vorvim, nhoi mhonn rupea vô bhangara vorvim, punn nixkollonk ani khotavinn Menddreachea, mhonngê Kristachea, omolik rogta vorvim: hacho ugddas dhôrat.
20
Sonvsar rochchê adim Devan Kristak nemun dovorlolo, punn hea nimannea kallar tumchê khatir Taka porgôtt kelo.
21
Tachê udexim tumi atam Devacher bhavarth dovorla: khorem mhollear, Devan Taka mornnantlo punorjivont korun mhoimek ubarlo dekhun, tumi Devacher bhavarth ani bhorvanso dovrunk pavleant.
22
Sotak khaltim zaun tumi xud’dh zaleant ani atam tumchean khorea monan bhavbhoinn koxim ekamekacho môg korunk zata. Tôr sogllea kallzan ekamekacho môg korat;
23
kiteak tumkam Devan novo zolm dila: Toch tumcho Bap. To vinaxi nhoi punn ovinaxi. Tannem tumkam Aplea sobda vorvim Jivit dilam: ho sôbd jivo ani sodam jivo urtolo.
24
Karonn Povitr Pustok oxem mhonntta: Ak’khem mon’xakull mhollear tonn ani tachi sobitai xetantlea fula itli: tonn sukta, ful bavta,
25
punn Devacho sôbd togta sodam-sorvodam. Teach Sobdachem Xubhvortoman tumkam porgôttlam.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.