Home

1Korintkarank Chapter 8 - Povitr Pustok Revised - 2010

1
Atam kuddea devank bhettoil’lea khannanchi gozal korum-ia. Tanchê vixim amam somestank ginean asa mhonn hanv boro zannom. Oslea gineanan ami fokot gorvan fulon ietanv; punn mogan ki ami khoreponnim vaddon vetanv.
2
Apnnak kiteachi pok’ki vollokh asa mhonn konnam-konnank disot; tôripunn ozun favo tosli vollokh tankam na.
3
Punn konn-konn Devacho môg kortat zalear, tankam Dev vollkhota.
4
Kuddea devank bhettoil’lea khannam vixim uloun, kuddo dêv mhonnlolo sonvsarant nanch, eka Deva bhair anink dêv nanch mhonn ami zannonv.
5
Kiteak zôrui zaum sorgar, zaum sonvsarant dèv mhonnlole asat ani khorench, tosle dèv ani dhoni khub!
6
tôrui amkam êkuch Dev asa ani To amcho Bap: Tachê thaun sogllem rochun ieta ani ami-i Tachê khatir asanv. Toxench ekloch amcho Somi, Jezu Krist: Tachê thaun sogllem ieta ani ami Tachê vôrvim jietanv.
7
Punn hem ginean soglleank na. Thoddeank oslea kuddea devanchi itli sonvoi zalea ki, aiz porian, bhettoil’lem khann khorench eka devak bhettoil’lem zal’lê porim tim ghetat, ani oxem tanchem osokt ontoskornn bhoxttota.
8
Khorench mhollear, khanna vôrvim ami Devak odik manovlolim mon’xam zainanv; tem khann ghenanv zalear, amkam kãi nuksann zaunchem na, ani tem gheun-ui amkam kãi faido na.
9
Tumkam kitem-i khaupachi sot’tia asa khorem, punn hi tumchi sot’tia osoktank patkacho soêg zaina zaunk chotrai dhôrat.
10
Tumi, ginean aslolim mon’xam, eka kuddea devachea devllant jevnnak boslolim astana dusrim konn-konn osokt ontoskornnachim tumkam polletat mhonn somzum-ia. Kuddea devank bhettoil’lem khann gheunk tankam-i dhir mellcho na?
11
Hea tumchea osokt bhavam vô bhoinnim pasot Krist melo, ani atam, tumchea gineanak lagun, hinch tumchim bhavbhoinn ibadd zaun gelim!
12
Hê porim, bhavam-bhoinnincher add patok korun ani tanchea osokt ontoskornnank dhopko diun, Kristacher add tumi patok kortat.
13
Mhonnttôch jevnna-khannak lagun mhozo bhav vô bhoinn patok korunk pavta zalear, hea fuddem mhojea bhava vô bhoinnik khotti dêkh dina zaunk hanv anink mas kednanch khauncho na.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.