Home

1Korintkarank Chapter 7 - Povitr Pustok Revised - 2010

1
Tumi mhaka boroun ghaleat tea prosnanchi khobor korum-ia. Konn-êk dadlo bailê kodde logn zaina zalear vaitt nhoi.
2
Punn oxem kamcharant poddot mhonnun, dôr-eka dadleak apli bail aschi ani dôr-êkê bailek aplo ghôv.
3
Dadlean aplê bailê thaim ani toxench bailen aplea ghova thaim ap-aplo lognacho kaido pallcho.
4
Bailek aplê khaxa kuddicher odhikar na, to tichea ghovak asa; têch bhaxen, ghovak aplê khaxa kuddicher odhikar na, to tachê bailek asa.
5
Lognik hok’kacho upeôg korunk ekamekak addaum nakat. Tôri prarthonak tumchem mon odik lavchê khatir, tumchêch bhitôr kobul zaun tumchean thoddo vêll kuxin ravum-iet, punn magir novean ektthaim jieunk lagat; na tôr, tumchean tumcheô kuddicheô vôndovnniô domaunk zaina zaun, Soitan tumkam tallnnent ghalit.
6
Oxem sangun hanv tumkam êk kaido ghaltam mhonn somzum nakat; hanv fokot hi sovlôt asum-iet mhonn tumkam ugddas kortam.
7
Tumi sogllim mhojê bhaxen zal’lim mhaka zai aslem; punn Devan zonn-ekleak kherit vôrgunn dila; ekleak êkê torecho vôrgunn ani dusreak dusrê torecho.
8
Atam don utram logna bhair asat tankam ani vidvank: tim mhojê bhaxen ravlim zalear odik borem.
9
Punn tanchean apleô vôndovnniô domaunk zaina zalear, tim logn zaunchim, kiteak kamcharan lason vechê bodlek logn zalear odik borem.
10
Logn zal’leank êk hukum’ ghaltam, ani to mhozo nhoi punn Somiacho: bail aplea ghova thaun veglli sorchi nhoi;
11
veglli sorli zalear, tinnem anink ekdam logn zaunchem nhoi, bogor aplea ghova lagim sondhan korchem; ani ghôv aplê bailê thaun vegllo sorcho nhoi.
12
Herank oxem sangtam: punn hem sangnnem mhojem, Somiachem nhoi. Amchea konn-eka bhavak onbhavarthi bail asa ani ti tachea vangdda khuxêmonan jieunk kobul asa zalear, tannem tika sôddun diunchi nhoi.
13
Ani toxench konn-êkê bailek onbhavarthi ghôv asa ani to tichea vangdda jieunk kobul asa tôr, tinnem taka sôddun diuncho nhoi.
14
Kiteak aplê bailê vôrvim onbhavarthi ghôv povitr zala; ani toxich amchea bhava vôrvim tachi onbhavarthi bail povitr zalea. Oxem nhoi aslem zalear, tumchim bhurgim-ballam opovitr zatolim aslim, punn atam tim povitr.
15
Punn onbhavarthi logna vangddi koddsoron vôchunk sôdta zalear, taka koddsoron vôchumdi; oslê poristhitint to bhav vô ti bhoinn lognant anink bandlolim uronant, kiteak Devan tumkam xantin jieunk apoileant.
16
Agê bailê, tujea ghovak suttka diunk tujean zaunchem na mhonn tum koxi zannoi? Ani tum, ghova, tujê bailek suttka diunk tujean zaunchem na mhonn tum koso zannoi?
17
Hem aikat: Devan zonnekleak apovnnem kelem tednam, Somian zonn-ekleak vanttun dilam tea dennea pormannem tannem cholchem, ani jea bhesar taka Devan apoila teach bhesar tannem ravchem. Sogllea Povitr-Sobhank hoch nêm’ hanv ditam.
18
Sunôt kel’leak Devachem apovnnem ailam zalear, kel’li sunôt tannem lipounchi nhoi; toxench sunôt korunk nasloleak Devachem apovnnem ailam tôr, tannem sunôt korchi nhoi.
19
Sunôt keli vô na keli, haka moluch na; punn Devacheô adnia pallop, hem ekuch ki molachem.
20
Apovnnem ghetlam tednam jea bhesar zonn-eklo aslo, teach bhesar tannem ravchem.
21
Devan tumkam apovnnem kelam tednam, tumi gulamam asleat? Tôr kãi porva na. Svôtontr zaunk sondi tumkam mellot zalear porian, tumi asat teach bhesacho zata titlo faido kaddat.
22
Kiteak Somiachem apovnnem ghetlam tednam jim konn gulamam aslim, tankam Somian svôtontr kelim; toxench Somiachem apovnnem ghetlam tednam jim konn svôntontr aslim, tim Kristachim gulamam zaleant.
23
Kimôt diun Devan tumkam gulam’ponnantlim soddoileant! Tôr mon’xanchim gulamam zaum nakat.
24
Bhavam-bhoinnimnô, jea bhesar zonn-ekleak Devan apovnnem kelam, teach bhesar Deva mukhar tannem vô tinnem ravchem.
25
Atam ozun logn zaunk nant tanchi khobor korum-ia: tanchê vixim Somian mhaka kãi hukum’ diunk na, punn, Somiachi doiallai mell’llolean hanv visvas favô aslolo sevôk zaunk pavlam mhonn zanno zaun, mhojem mot sangtam.
26
Vaittam-vignanche dis lagim pavleat, dekhun jea bhesar monis asa, teach bhesar to ravlear borem.
27
Êkê bailê kodde lognachea bandpasant asai? Tôr tika sôddunk sôdum naka. Bailechea logna-bandpasant naim tum? Tôr potinn sôdum naka.
28
Punn logn zaxi zalear, tuka patok zaina. Toxench ek ankvar cheddum logn zait zalear, taka-i patok zaina. Tôri logn zatat tankam hea sonvsari jivitache upodre-koxtt astole, tantlim tumkam hanv vattaunk sôdtam.
29
Bhavam-bhoinnimnô, hanv sangunk sôdtam tem itlench: Devan tharail’lea kallachi sompadnni pavli. Dekhun hea fuddem bail asloleamnim logn zaunk naslolê porim;
30
dukh kortat tãnnim dukh korinaslolê porim; utsôv kortat tãnnim utsôv korinaslolê porim; viktem ghetat tãnnim apnnam lagim kãich naslolê porim;
31
hea sonvsaracheô vôstu vaportat tãnnim osleanch vôstumnim ghuspon naslolê porim jieunchem; kiteak hea sonvsarachem atanchem rup anink chôdd kall togpachem na.
32
Tumi huskeam-vinnem jiel’lim mhaka zai. Logn zaunk naslolea eka dadleak Somiachea vôstuncho husko asa; apunn Somiak koso manovtolo, hachê vixim taka husko.
33
Punn logn zal’lea dadleak hea sonvsarachea vôstuncho husko asa; aplê bailek koso khoxi kortolo, hachê vixim taka husko, ani oxem tachem mon veg-vegllê vatten oddon veta.
34
Toxench êkê logn zaunk naslolê bailek vô êkê ankvarik Somiachea vôstuncho husko asa, kiteak ti kuddin ani monan povitr zaunk vavurta; punn logn zal’lê bailek hea sonvsaracho husko asa: aplea ghovak koxi manovtoli, hachê vixim tika husko.
35
Hem tumcheach adavak sangtam. Tumkam gorjê bhair bandun dovrunk mhojem mon nhoi; punn tumi mannsugen jieunchê khatir ani sogllea kallzan tumi Somiachi bhokti korchê pasot hem sogott tumkam boroilam.
36
Konn-ui aplê ankvar hoklê sorim apleô vôndovnniô ap-domavnnechê ximê bhair vaddleat mhonn polleta, ani apli chal tichê lagim sarki nhoi mhonn takach disun ieta, ani dekhun favo to upai gheunchi goroz mhonn taka disot zalear, apnnak borem dista tem tannem korchem. Tim logn zaunchim; oxem korun patok aschem na.
37
Punn êk novro, konnachench boll nastana, aplea ap-khuxen ghetlolea tharavant thir asa ani aplê ankvar hoklek toxich apli hokol koxi dovrunk sôdta zalear, to-i borem korta.
38
Mhonnttôch aplê ankvar hoklê lagim logn zata to borem korta; ani logn zaina to odik borem korta.
39
Logn zal’li bail, ticho poti jivo aso-sôr, taka bandloli asa; punn ticho ghôv morot zalear, ti meklli zali ani apnnak zai tea dadlea lagim tichean logn zaum-ieta; to ghôv Somiacher bhavarth aslolo mat zauncho.
40
Ti vidvechea bhesar ravot zalear, ti odik bhagi; hem mhojem mot. Ani mhojê sovem Devacho Atmo asa mhonn hanv zannom.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.