Home

1Korintkarank Chapter 6 - Povitr Pustok Revised - 2010

1
Tumchê modem konnancho dus ream kodde vivad aslo tôr, nit korun gheunk, Devan povitr kel’lea bhavam-bhoinnink sôddun, bhavarth naslolea mon’subidaram mukhar vôchunk koxim mhonn tim fuddem sortat?
2
Devan povitr kel’lim mon’xam hea sonvsarachi nit kortolim mhonn nokllot tumi? Hea sonvsarachi tumi nit kortoleat zalear, hea kirkoll vivadanchi nit korunk tumi purtim nhoi?
3
Devan rochlolea dutam modem atam bore ani vaitt konn te nirnnoi gheunk amchea hatant ghal’lem asa mhonn nokllot tumi? Mhonnttôch hea dispottea tontteanchi nit amchean korunk zaina?
4
Tumchê modem osle tontte utpon zatat tednam, nit korun gheunk Povitr-Sobhent koslench mol naslolea mon’xam fuddem tumi vetat tem kitem?
5
Tumkam lojek ghalunk hem tumkam sangtam. Bhavam-bhoinnim modem utpon zal’lo tontto suttavô korunk, tumchêch modem sobhent êk-ui zannar na?
6
Na zal’lê bhaxen, êk bhav vô bhoinn dusrea bhavak vô bhoinnik neaisobhent ubim kortat ani onbhavarthiank nit korunk laitat!
7
Tumchê modem khottle asat tench ekdomuch vaitt; tumi onit sõslear odik borem nhoi? Tumkam nagounk dilear odik borem nhoi?
8
Punn portench, onit ani nagovnn tumich kortat ani teô-i bi tumchêach bhavam-bhoinnink.
9
Devachea Rajeachem daiz khottea mon’xank mellchem na mhonn nokllot tumi? Tumi fosom nakat: pozddim mon’xam, kuddea devank bhôzpi, pordvari, kamchari, apleach lingachea mon’xa kodde pozoddponn korpi,
10
choriô korpi, apsvarthi, bebdim, ulovpan opman korpi, nagovnnaram oslim mon’xam Devachea Rajeachem daiz zôddchim nant.
11
Tumchê modem oslim kãi zannam adim aslim; punn atam Somia Jezu Kristachea Nanvan ani amchea Devachea Atmea vôrvim tumi Snan gheun nitoll, povitr ani Devak manovlolim zaleant.
12
Konn-konn mhonnot: Mhojean sogllem korum-ieta. Hôi, punn sogllench mhojea adavak poddona; sogllem mhojean korum-ieta khorem, punn kiteachoch hanv gulam’ zauncho na.
13
Anink konn mhonnott: Khann-jevônn pottak, ani pott khannajevnnak. Hôi, punn him don-ui Dev nattak kortolo. Dôr-eka mon’xachi kudd pozoddponnak bhettovpachi nhoi, ti Somiak bhettoil’li asa; toxench Somi dôr-eka mon’xachê kuddint tthikann korun ti Apli korun gheta.
14
Devan Somiak punorjivont kelo, tosoch To Aplê podven amkam-i punorjivont kortolo.
15
Tumcheô kuddi Jezu Kristache sandhe mhonn nokllot tumi? Mhonnttôch Kristache sandhe gheun êkê xindôll baileche sandhe mhojean korum-iet? Na ki na!
16
Zo monis êkê xindôll bailek ektthovta, to tichê kodde êkuch kudd zata mhonn nokllot tumi? Kiteak Povitr Pustokar oxem mhonnlolem asa: Tim dogam-i êkuch kudd zatolim.
17
Punn Somi ani Tachea ekvottant jietat tim ekach jivan jietat.
18
Pozoddponn nibêl sôddun diat. Mon’xam kortat tim her sogllim patkam kuddi bhailim; punn pozoddponn kortat tim aplêch kuddicher add patok kortat.
19
Tumi Deva koddcho Povitr Atmo ghetla ani To tumchê sovem tthikann korun asa; tôr tumchi kudd Tachem mondir ani tumi tumchinch nhoi: hem nokllot tumi?
20
Devan tumkam gulam’ ponnantlim soddoileant, ani tem-i zalear kimôt farik korun. Mhonnttôch tumchê kuddin Devak mhoima diat.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.