Home

1Korintkarank Chapter 3 - Povitr Pustok Revised - 2010

1
Bhavam-bhoinnimnô, Atmo mell’lla tea mon’xam kodde hanv uloitam toxem, tumchê lagim mhojean ulounk zaunk na; punn mon’xasoimbachea vôndovnniam pormannem choltolea mon’xam lagim koxem, tumchê kodde hanv uloilam; kiteak Krista sovem tumi ozun supurlim ballkam.
2
Hanvem tumkam pieunk dud dilam, sukem khann tumkam diunk na, kiteak toslem khann-jevônn gheunk tumchêan tednam nozo aslem; ani ozun-ui nozo.
3
Kiteak tumi ozun mon’xasoimbachea vôndovnniam pormannem jietat. Tumchê modem nattkai ani zhogddim vôstat mhonnttôch, tumchêa jivitachi chal mon’xa-soimbachea vôndovnnianchi zali ani tumi fokot masa-rogtachim mon’xam zaleant, oxem nhoi?
4
Kiteak, jednam tumchê modlo konn-konn mhonntta ‘hanv Paulucho’, ani dusro mhonntta ‘hanv Apolocho’, tednam tumchi chal fokot masa-rogtachea mon’xanchi nhoi?
5
Apolo kitem? Ani Paulu kitem? Tumkam bhavarth dila te sevôk ami; ani zonn-ekleachi seva fokot Somian dilam tea dennea pormannem.
6
Hanvem roilem, Apolon ximplem, punn Devan vaddoilem.
7
Tôr roitat vô ximptat tim mhotvachim nhoi; vaddoita To ki mhotvacho, ani Ho mhollear Dev.
8
Konn-konn roitat, dusrim konn-konn ximptat, punn roitoleam ani ximptoleam modem ontôr na; zonn-eklean kam’ kelam tea pormannem Dev taka mozuri ditolo.
9
Kiteak ami ekamekak hat diun kam’ kortanv, punn kam’ Devachem, ani tumi tem Devan roil’lem xet. Tea bhair, tumi Devan bandlolem ghor.
10
Devan mhaka dil’lem dennem vaprun, eka gholl’lolea ghor-xilpia bhaxen, hanvem buniad ghali, ani atam tê buniadir dusro konn bandta. Punn apunn koxem bandta tacher zonn-eklean lokx ghalchem.
11
Kiteak ghal’li asa ti buniad Jezu Krist: hichê bhair, anink êk buniad konnachean ghalunk zaina.
12
Hê buniadicher konn bandta zalear, to bhangar vô rupem vô moladik mannkam vaprun bandit; vô to lankudd vô tonn vô korodd vaprun bandit.
13
Punn zonn-ekleacho vavr koslo to dokhôl kortolo to Sorvesporacho Dis udetolo; ho Dis uzo gheun ietolo ani ho uzo dôr-eka mon’xacho vavr kosak laitolo.
14
Buniadir bandlolem konnachem kam’ ubem urlem zalear, taka mozuri melltoli.
15
Zacho vavr ulpon vôchot, taka nuksann ietolem; punn to apunnuch ujeantlean dhanvun gel’lê porim taronn zôddtolo.
16
Tumi Devachem mondir ani Devacho Atmo tumchê sovem tthikann korun asa mhonn tumkam khobor na?
17
Zôr konn-ui Devachea mondirachem nisontton kortit, tôr Dev tancho nas kortolo; kiteak Devachem mondir povitr, ani tumich hem mondir!
18
Konnench apnnakuch fosoum noiê; tumchê-bhitôrlim konn-ui hea iugachea nemam pormannem apunn zannar mhonn somzotat zalear, tãnnim khorench zannar zaunchê khatir pixim zaunchem poddtolem.
19
Karonn Deva mukhar hea sonvsarachi zannvai ek pixeponn, kiteak Povitr Pustokar oxem boroil’lem asa: To zannarank tanchêch naddbudhi vôrvim dhôrta.
20
Ani dusrê kodden oxem boroilolem mellta: Zannar mon’xanchim chintnam polkim mhonn Sorvespor zanno.
21
Mhonnttôch khoincheach mon’xachem nanv gheun, konnench apli vhoddvik gazounchi nhoi.
22
Khorem mhollear, sogllem tumchêm: Paulu, vô Apolo, vô Kefas, sonvsar, vô jivit, vô moronn, atancho ani fuddlo kall hem sogllem tumchênch;
23
punn tumi Kristachim, ani Krist Devacho.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.