Home

1Korintkarank Chapter 15 - Povitr Pustok Revised - 2010

1
Bhavam-bhoinnimnô, hanvem tumkam porgôtt kelam tea Xubhvortomanacho tumkam atam ugddas kortam; tench tumi manun ghetlam ani thir bhavarthan tem tumi samballtat;
2
Zachêch vorvim tumkam taronn mellta. Koslo ôrth diun tem hanvem tumkam porgôtt kelam? Toch ôrth dhôrun tem tumi samballtat mum? Na zalear, bhavarth dhôrun kosloch faido na tumkam!
3
Borem tôr, mhaka porgôtt kelam toxench, hanvem tumkam choddan-chodd mhotvachem porgôtt kelam tem hem: ki Povitr Pustokam pormannem Krist amchea patkam pasot melo,
4
ani Taka nikhipilo, ani Povitr Pustokam pormannem tisrea disa Devan Taka punorjivont kelo;
5
To Kefasak ani uprant Barank dixtti poddlo.
6
Tea uprant, ekach farak, pãixeam-vôn choddam amchea bhavam-bhoinnink To dixtti poddlo; hantlim chodd zannam ozun jivim asat, punn thoddim morun gelim.
7
Magir dixtti poddlo Jakobak ani tea uprant sogllea dhormdutank nhoi, punn Povitr Sobhent Jezuche ani Xubhvortomanache hurbevont porgôttnnar.
8
Soglleam fattlean mhaka-i, hea ovchituch bollan zolma haddloleak, To dixtti poddlo.
9
Dhormdutam modem soglleam-vôn hanv hinn-holko; Devachê Povitr-Sobhek hanvem dhumallo dilo dekhun, mhaka Dhormdutachem nanv porian favo na.
10
Punn, Devachea funkeachea dennean, hanv khoro Dhormdut, ani Tannem mhaka favo kel’lem dennem nirfoll zaunk na. Portench zalear, heram soglleam poros hanvem odik chôdd vavr kela; khorem mhollear hanvem nhoi, punn mhojê sovem asa tea Devachea dennean.
11
Punn gorjechem tem hem: te zaum vô hanv zaum, oxench ami porgôtt kortanv, ani oxench tumi bhavarthan manun ghetlam.
12
Kristak Devan mel’leantlo punorjivont kela mhonn ami porgôtt’tanv zalear, mel’leanchem punorjivontponn na mhonn tumchê modlim thoddim zannam sangtat tem koxem tôr?
13
Mel’leanchem punorjivontponn nanch zalear, Devan Kristak-ui punorjivont korunk na.
14
Ani Kristak Devan punorjivont korunk na zalear, amchi porgôttnni pokôll, ani tumcho bhavarth-ui pokôll.
15
Itlench nhoi: ami Devache khotte sakxidar mhonn sangchem poddlem, kiteak Devan Kristak punorjivont kela mhonn ami sakxi dilea; punn mel’leam mon’xank Dev punorjivont korcho na mhonn khorem zalear, Devan Kristak-ui punorjivont korunk na, oxem mhonnchench poddlem. Mhonnttôch, Devan Kristak punorjivont kela mhonn sangun ami dil’li sakxi Devacher add sakxi zali.
16
Dusrim sangtam: mel’lea mon’xank Dev punorjivont korcho na mhonn khorem zalear, Kristak-ui Devan punorjivont korunk na.
17
Ani Devan Kristak punorjivont korunk na zalear, tumcho bhavarth sarko nirfôll, tumi ozun tumchea patkamnim asat.
18
Mhonnttôch jim Kristacher bhavarth dovrun meleant, tancho ibadd zalo.
19
Kristacher ami dovortanv to bhorvanso fokot hea jivitak amkam faideacho zalear, sogllea mon’xam-vôn ami odik dolldirim.
20
Punn sot tem hem: Krist mel’leam modlo Malgoddo mhonn Devan Taka mel’leantlo punorjivont kela.
21
Kiteak, zoxem eka mon’xa vorvim moronn ailem, toxench eka mon’xa vôrvim mel’leanchem punorjivôntponn-ui ieta.
22
Hôi, zoxem Adanva sovem sogllim mortat, toxench Krista sovem soglleank Dev punorjivont kortolo.
23
Punn sogllim Devan tharail’lea kroma pormannem: poilo, Malgoddo mhonn, Krist; magir, Krist ietolo tednam, Kristachim tim sogllim.
24
Uprant sompadnni: tednam To sogllea Pordhanancho ani sogllea Odhikariancho ani Podviancho bhosm korun, Raj Devachê, Aplea Bapachê, adhin kortolo.
25
Kiteak Devan sogllea Tachea dusmanank Tachea pãiam tolla ghali porian, Krist razvôtt choloitolo: hi Devachi ievzônn.
26
Bhosm zaupacho dusmanam modlo nimanno dusman mhollear Moronn.
27
Khorench, Povitr Pustokachea utramnim, Devan sogott Tachea pãiam tolla ghalam. Sogott Tachea pãiam tolla ghal’lem asa mhonnttana, Povitr Pustok Devak mat bhair dovorta, kiteak Tannem ki sogott Kristachea pãiam tolla ghalam.
28
Sogott Tachea pãiam tolla ghalun zalea uprant, toch Put Aplea pãiam tolla sogott ghalam Tachê adhin, mhonngê Aplea Bapachê adhin, Apnnakuch kortolo. Hê porim Dev Ekloch Eklo Apunnuch zatolo sogtta-sorvanchi Bhorti ani Sompadnni.
29
Na zalear, mel’leam khatir snan ghetat tankam koslo faido asa zait? Dev zôr mel’leam mon’xank punorjivônt korchoch na, tanchê khatir kiteak mhonn snan ghetat?
30
Ami-i zalear, kiteak mhonn ami ghoddiechê ghoddiê sonkoxttamnim jietanv?
31
Bhavam-bhoinnimnô, amchea Somia Jezu Krista sovem tumchê khatir zo mhaka obhiman bhògta, tachean soput gheun hanv tumkam sangtam: dôr disa mornnachea sonkoxttant hanv asam.
32
Fokot mhojem mon’xasoimbachem boll dakhounk Efezant tea savzam kodde hanv loddai korunk pavlom zalear, koslo faido mell’lla mhaka? Dev zôr mel’leam mon’xank punorjivont korcho na, Povitr Pustokar melltat tea utram pormannem, borench khaum-ia ani pieum-ia, kiteak faleam ami mortoleanv.
33
Fosom nakat: khottea sangatiank gheun bhonvxi, tujench borem jivit padd korxi.
34
Utthat, soirannar ieiat ani tumchi vankddi vatt sôddun diat! Tumchê modlea thoddeank Devachi sarki vollokh na: loz tumkam, punn hem tumkam hanvem sangchench poddta.
35
Punn konn-konn oxem mhonntit: Meleant tankam Dev koxim punorjivont kortolo? Kosli kudd gheun tim portim ietolim?
36
Arê pixea! Jem bim tum vômptai, tem melea xivai taka novo jiv mellona.
37
Tum vômptai tem bim magir dixtti poddtolem tem nhoi, punn fokot bim, mhonnum-ia gonvachem vô anink koslem-i.
38
Tea biak Dev, Apnnench tharailam toxem, ang ditolo, ani dôr-eka jin’sachea biak ap-aplem ang.
39
Sogllem mas ekuch mas nhoi; mon’xanchem mas ek, mon’zatinchem mas dusrem, suknneanchem mas vegllem, ani masllianchem anink-ui vegllem.
40
Prithver kuddi asat toxench ontrallar-ui kuddi asat; ontralla veleam kuddink sundorai asa ti êk, ani prithver asat tea kuddinchi sundorai veglli.
41
Suriacho porzôll êk, chondrimacho porzôll dusro, ani noketrancho porzôll ozun vegllo. Ani noketram modem porian porzôll vegllo-vegllo.
42
Mel’leanchem punorjivontponn-ui toxench: biam vori ami vômptanv ti kudd vinaxi, Dev voir kadta ti ovinaxi;
43
ami vômptanv tem hinn-holkem, Dev voir kaddta tem mhoimen bhòrlolem; ami vômptanv tem osokt, Dev voir kaddta tem xoktivônt;
44
ami vômptanv tem êk soimbachi kudd, Dev voir kaddta tem Povitr Atmeachea jivan jivi zal’li kudd. Soimbachi êk kudd asa, toxich Povitr Atmeachea jivan jivi zal’li êk kudd asa. Povitr Pustokar boroil’lem asa tea pormannem,
45
poilea mon’xak, Adanvak, Devan êk jivô monis kelo; nimannea Adanvak Tannem Jivit divpi Atmo kelo.
46
Punn poilo aila to Povitr Atmeachea Jivan jivo zal’lo monis nhoi, punn fokot soimbachea jivan jivo, unnea molacho to; uprant ki to odik mhotvacho ailo, Povitr Atmeachea Jivan jivo zal’lo Monis.
47
Poilo monis, zomni thaun ghôddlolo to, matiecho; Dusro Monis sorgincho.
48
Zoso to poilo matiecho, toxim matiechim tim tachê sarkim; ani zoso ho Dusro sorgincho, toxim sorginchim tim Hachê sarkim.
49
Mhonnttôch, zoxem ami matiechea mon’xachem sarkem gheun aileanv, toxench sorginchea Mon’xachem sarkem ami ghetoleanv.
50
Bhavam-bhoinnimnô, hanv sangunk sôdtam tem hem: amchea masa-rogtak Devachea Rajeachem daiz zôddunk tank na: vinaxi soimbak ovinaxiponn zôddunk xokti na.
51
Aikat, hanv khobor kaddtam ti eka guddart sotachi: ami sogllim morchim nanv, punn êkê ghoddiê bhitôr, dollo bittbitt’ta mhonnosôr, nimannê tuturechea sadar Dev amam-soglleanchem rupantor kortolo. Tôr êk turturi vaztoli ani mel’lea mon’xank Dev ovinaxi soimban punorjivont kortolo ani oxem Toch amchem rupantor kortolo.
52
Aikat, hanv khobor kaddtam ti eka guddart sotachi: ami sogllim morchim nanv, punn êkê ghoddiê bhitôr, dollo bittbitt’ta mhonnosôr, nimannê tuturechea sadar Dev amam-soglleanchem rupantor kortolo. Tôr êk turturi vaztoli ani mel’lea mon’xank Dev ovinaxi soimban punorjivont kortolo ani oxem Toch amchem rupantor kortolo.
53
Kiteak vinaxi tem ovinaxi zaunchem mhonn ani morun veta tem omor zaunchem mhonn Devachi khuxi.
54
Vinaxi tem ovinaxi zalea uprant, ani morun veta tem omor zalea uprant, Povitr Pustokar boroil’lem asa tem utor ghoddon ietolem: Zoit mell’lem, mornnacho bhosm zalo!
55
Ê Mornna! Tujem zoit khoim atam? Ê Mornna! Tujêm kuns khoim anink urlam?
56
Moronn haddta tem kuns mhollear patok, ani patkak boll dita ti Somurt.
57
Amchea Somia Jezu Krista vorvim Dev amkam zoit ditach: tôr Devak amcho dhin’vas gavum-ia!
58
Mhonnttôch, mhojea bhov pritichea bhavam-bhoinnimnô, sodanch ghott ravat, thir ravat, odik-odik hurben Somiachi seva korit ravat. Tumcho koxtti vavr Somi bhov follabhorit kortolo mhonn monant dhôrat.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.