Home

1Korintkarank Chapter 11 - Povitr Pustok Revised - 2010

1
Zoso hanv Kristachi dêkh ghetam, toxem tumi mhoji dêkh gheiat.
2
Tumi sodanch mhozo ugddas kortat mhonn ani hanvem tumkam xikoil’leô chali tumi samballtat mhonn hanv tumkam vakhann’nntanv.
3
Dôr-eka dadleachem Mostok Krist, ani dôr-êkê bailechem mostok ticho poti, ani Kristachem Mostok Dev: hem tumi zanno zal’lim mhaka zai.
4
Zo dadlo aplem mathem dhampun prarthon korta vô Devacho sondêx dita, to aplea Mostokacho man kaddta.
5
Urfattim, ji bail aplem mathem dhampinastana prarthon korta vô Devacho sondêx dita, ti aplea mostokacho man kaddta, kiteak ti sarki êkê kens-taslolê bailê bhaxen zata.
6
Zôr êk bail aplem mathem dhampina, tôr tinnem aple kens tasche; punn zôr kens katrunk vô mathem tasunk êk lojechi vôst, tôr tinnem aplem mathem dhampchem.
7
Dadlo Devacho rupkar ani porzôll dekhun, tannem aplem mathem dhampunk favô na; punn bail dadleacho porzôll.
8
Tôr dadlo bailê thaun nhoi, punn bail ki dadlea thaun rochun ailea.
9
Itlench nhoi, dadleak bailê pasot rochunk na, punn bailek ki dadlea khatir rochlea.
10
Hea pasot, devdutank favô to man dakhounchê khatir, tinnem aplem mathem dhampchem.
11
Tôri astam, Somiachea uzvaddan hem ami somzunk pavtanv: zoxem dadlea vinnem bailek moluch na, toxench bailê vinnem dadleak-ui moluch na;
12
kiteak bail dadlea thaun rochun ailea khorem, punn dôr-êk dadlo bailê thaun zolmun ieta, ani sogllench Deva thaun upzota.
13
Tumich borem-korn chintun sangat: aplem mathem dhampinastam Devak prarthon korunk bailek sobta?
14
Soimb legun kitem xikoita tem polleiat: dadleache lamb kens mhollear tacho man kaddtat,
15
punn baileche lamb kens ticho man vaddoitat, kiteak lamb kens bailek matheachi nhesônn koxi dil’le asat.
16
Konn-ui hê vixim vivad korunk sôdta zalear, hanv itlench sangtam: amchê modem ani Devachê khoinchêch sobhê modem dusri chal na.
17
Ozun tumkam xikovnn diunchi asa: tumchea zomatim vixim mhojean tumkam vakhannunk zaina, kiteak teô tumkam borem korchê bodlek tumkam odik vaitt kortat.
18
Poilê svater, tumchi sobha bhòrta tednam tumchê modem futti asat mhonn hanvem aikolam, ani hem ogllem-unnem khorem-xem mhaka dista.
19
Khorem mhollear, tumchê modem konn visvas favô-aslolim tim vollkhun gheunchê khatir tumchê modem futti aslear borem.
20
Tumchi sobha bhòrta tednam, tumi kortat tem Somiachem Rat-Jevônn nhoi!
21
Kiteak tumi jevunk lagtat tednam, ek-eklo, dusreank ravonastana, ap-aplem jevonn jevun kaddta; hê porim konn-konn upaxim urtat ani konn-konn bebdim zatat.
22
Jevunk ani pieunk tumchim khaxa ghoram nant tumkam? Vô Devachê Sobhechi beporva kortat tumi ani kãich na tankam lojek ghalunk sôdtat? Hanv tumkam kitem mhonn sangum? Xabaski dium? Hê vixim mhojean tumkam xabaski diunk zaina.
23
Somia koddli ji hanvem xikovnn ghetlea, tich hanvem tumkam dilea: Somi Jezu poradhin zalo tê rati Tannem unddo ghetlo,
24
Devak dhin’vasun to môddlo ani mhollem: Hi Mhoji Kudd: Hanvem ti tumchê pasot somorpunchi asa. Mhozo ugddas korun, oxench tumi korat.
25
Têch porim, jevônn zatôch Tannem patr ghetlem ani mhollem: Hem patr Mhojea Rogtan sthaplolo Novo Korar. Tumi hantlem pietat titlê-i pavtti, Mhozo ugddas korun oxench tumi korat.
26
Kiteak tumi ho Unddo khatat ani hea patrantlem pietat titlê-i pavtti, Somi ie porian Tachem moronn tumi porgôtt kortat.
27
Mhonnttôch, jim konn favo na tê bhaxen ho Unddo khatat ani Somiachea patrantlem pietat, tim Somiachê Kuddicher ani Rogtacher add guneanv kortat.
28
Dekhun zonn-eklean poili apli chovkoxi korchi ani uprant ho Unddo khauncho ani hea patrantlem pieunchem.
29
Kiteak jim konn hi Somiachi Kudd mhonn vollkhun ghenastana khatat ani pietat, tim aplench khastichem formonn khatat ani pietat.
30
Hea pasot tumchê modem zaitim zannam piddevônt ani osokt zal’lim asat ani sobar zannam morun geleant.
31
Ami poili amchich chovkoxi kel’li zalear, amcher khastichem formonn poddchem naslem.
32
Punn sonvsara borabôr amcher khastichem formonn poddona zaunk, Somi amkam nitt margar haddchê khatir amkam xistichi kosli-kosli xikxa dita.
33
Mhonnttôch, mhojea bhavam-bhoinnimnô, tumi jevnnak ektthaim zatat tednam, ekamekak ravat;
34
konnank-ui bhuk lagta zalear, tãnnim aplea ghora jevun ieunchem; tednam tumchi zomat tumcher khastichem formonn haddchi na. Urlolea prosnam vixim, hanv ietolom tednam gorjeche nem’ ditolom.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.