Home

1Korintkarank Chapter 1 - Povitr Pustok Revised - 2010

1
Hanv Paulu, Devachê khuxen Jezu Kristacho Dhormdut zaunk apoil’lo, ani amcho bhav Sostenes
2
Korintant aslolê povitr-sobhek hem potr boroitat. Jim konn sogllê svater amchea Somia Jezu Kristachem Nanv gheun Taka ulo martat, tea soglleanchea sangata povitr zaunk tumkam Devan apoileant ani tumkam Jezu Kristak ekvôttaun povitr keleant. Ho Jezu Krist tancho ani amcho Somi.
3
Deva amchea Bapachi ani Somia Jezu Kristachi doiallai ani xanti tumkam favô zaum.
4
Tumchê pasot hanv mhojea Devak sodanch dhin’vastam, kiteak Jezu Krista sovem Devachi doiallai bhôgunk Tannem tumkam favô kelam,
5
mhonngê Tachea ekvôttant sogllea bhanddaranchi bhorti Deva koddsun tumkam mell’llea; Devan tumkam purnn zannvai dilea ani ti purnntaien ucharchem dennem favô kelam,
6
kiteak Krista vixim dil’li govaiki tumchê modem ghôtt riglea.
7
mchea Somia Jezu Kristachê prokasnnek tumi ravtat; To ie-sôr kosloch vôrgunn tumkam unno na.
8
Amchea Somia Jezu Kristachea Disa tumi opradha vinnem aschê khatir, Toch tumkam xevôttak porian thir korun dovôrtolo.
9
Devan tumkam Aplea Puta Jezu Kristak, amchea Somiak, ekvôttonk apoileant, ani Dev visvaxi.
10
Bhavam-bhoinnimnô, amchea Somia Jezu Kristachea nanvan hanv tumchê lagim prarthun magtam: tumchê modem futti sompoun, ekmotan tumi ulounchem; tumi eka monachim ani eka motachim zaun, tumchê modem sopurnn ekvôtt vôsum.
11
Tôr, mhojea bhavam-bhoinnimnô, tumchê modem vivad zatat mhonn Kloechea loka koddsun mhaka kollon ailam.
12
Hanv oxem sangunk sôdtam: tumchê modlo konn-konn hanv Paulucho, konn-konn hanv Apolocho, konn-konn hanv Kefasacho, ani konn-konn hanv Kristacho, oxem mhonnttat.
13
Kristache vantte zaleat kitem? Pauluk tumchê pasot khursar marlo kitem? Pauluchea nanvan tumkam Povitr-Snan dilam tôr?
14
Krispus ani Gaius hanchê bhair, tumchê modlea konnakuch hanvem Povitr-Snan diunk na mhonn hanv Devak argam ditam.
15
Mhonnttôch mhojea nanvan hanvem konnak Povitr-Snan dilam mhonn konnachean mhonnunk zaina.
16
Na, hanvem sarkem sangunk na: Stefanachea ghorabeak-ui hanvem Povitr-Snan dilam; hanchê bhair konnak dilam zalear hanv nokllom.
17
Kristan mhaka Povitr-Snan diunk pattounk na, punn Xubhvôrtoman porgôttunk dhaddla; ani tem-i zalear sundorbhaxa vaprun nhoi; na tôr, Kristachea khursak anink ôrthuch ascho naslo.
18
Khorench, khursacho nirôp mhollear ibadd zatat tankam ek pixeponn; punn taronn mellta tankam, mhonngê amkam, to nirôp Devachi xokti.
19
Kiteak Povitr Pustokar oxem boroil’lem asa: Tanchea zannaranchi zannvai padd kortolom ani tanchea budhvôntanchi budh nirorthi kortolom.
20
Khoim pavle atam tuje vidvan? Khoim gele tuje ponddit? Hea kalla-iugache vivad-korpi xastri khoim anink urle? Hea sonvsarachi zannvai Devan pixi korun sôddli nhoi?
21
Khorench mhollear, sonvsar aplêch zannvaien Devak vollkhunk pavlo na: hem Devachê zannvaiechem nirmonn. Dekhun ami porgôtt’tanv tea niropachea pixeponna vôrvim bhavarth dhôrtoleank taronn mellchem mhonn Devachi khuxi zali.
22
Tôr Judêv lôk khunna magta ani Grik lôk zannvai sôdta;
23
punn ami porgôtt’tanv To khursar marlolo Krist. Judevank bhavarth dhôrunk To motti addkhôll, ani videxiank pixeponn;
24
punn Devan apoil’leank Judevank toxem Grikank To Devachi Xokti ani Devachi Zannvai.
25
Khorench, jem kitem Devachi pisai dista, tem mon’xanchê zannvaiê poros odik xannem; ani jem kitem Devachi osoktai dista, tem mon’xanchê xokti poros odik xoktivônt.
26
Bhavam-bhoinnimnô, tumi Devan apoil’lim mon’xam: tumchich gôt kosli ti polleiat: mon’xanchê nodren, tumchê modem vhodd xikxonnachim chodd-xim nant, podvi aslolim chodd-kãi nant, ani unch kulliechim-i chodd-xim nant.
27
Tôri zannarank lojek ghalunk, jea konnank sonvsar pixim mhonn dhôrta, tankanch Devan vinchun kaddleant; ani xoktivôntank lojek ghalunk, jea konnank sonvsar osokt mhonn lêkhta, tankanch Devan vinchun kaddleant;
28
toxench jea konnank sonvsar holko lôk, koslench mol-naslolo lôk mhonn dhôrta, tankam mol-asloleancho nas korunk Devan vinchleant.
29
Hê porim konnacheanuch Deva mukhar apli vhoddvik korunk zaina.
30
Tacheach dennean tumi Jezu Kristachea jivan jietat. Devan oxem kelam ki Tachê bhair anink amkam Zannvai na, Tacheach ekvôttant Dev amkam Apnnak manovlolim ani Aplêch povitrtaien povitr korta, ani Tachêch vôrvim To amkam purnn taronn dita.
31
Dekhun, Povitr Pustokar boroil’lem asa tea pormannem, konn-ui apli vhoddvik gaizounk sôdtat zalear, Sorvesporan apnnam khatir kelam tea pasot Tachi vhoddvik tãnnim gaizounchi.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.