Home

1Juanv Chapter 5 - Povitr Pustok Revised - 2010

1
Jim konn Jezuk Krist mhonn bhavarthan manun ghetat, tim Deva thaun zolmoleant. Ani jim konn Bapacho môg kortat, tim Tachea bhurgeancho-i môg kortat.
2
Ami Devacho môg kortanv ani Tacheô adnia palltanv zalear, dubava virêt ami Devachea bhurgeancho-i môg kortanv mhonn amkam kollon ieta.
3
Karonn Devacho môg korop mhonngê Tacheô adnia pallop.
4
Ani Tacheô adnia zhodd nhoi, kiteak zankam Devan zolm dila, tãnnim sonvsaracher zoit vhelam. Sonvsaracher ami zoit vhelam tem hem: amcho bhavarth.
5
Konn sonvsaracher zoit vhorta zait? Jezu Devacho Put mhonn bhavarth dhôrtat tinch.
6
Ailo to Jezu Krist; udka ani rogta vorvim To ailo. Udkachêch vorvim nhoi, tôr udka ani rogta vorvim. Ani Povitr Atmo haka govai dita, kiteak Atmo mhollear Sot.
7
Haka tin govaianchi sakxi asa:
8
Atmo, udok ani rogot, ani hea tegãichi govaiki êkuch.
9
Mon’xanchi govaiki ami manun ghetanv; punn Devachi govaiki odik visvas favo asloli. Ani hi govaiki Devan Aplea Puta vixim dil’li asa.
10
Jim konn Devachea Putacher bhavarth dovortat, tanchê sovem hi Devachi govaiki asa. Jim konn bhavarth tthevinant, tim Devak fottkiro korun sôddtat, kiteak ji govaiki Devan Aplea Puta vixim dilea, ti tãnnim mandun gheunk na.
11
Hi asa ti govaiki: Devan amkam Sasnnik Jivit dilam. Ani hem Jivit Tachea Puta sovem asa.
12
Jea mon’xam sovem Put asa, tea mon’xank Jivit asa; jea mon’xam sovem Put na, tea mon’xank Jivit-ui na.
13
Tumchê sovem Sasnnik Jivit asa, kiteak tumi Devachea Putacher bhavarth dovorla; hem tumi zanno zaunchê khatir hem sogllem hanvem tumkam boroilam.
14
Kitem-i ami Devachê khuxê pormannem Tachê lagim magum, To amkam aikota: Tacher ho amcho purnn visvas asa.
15
Ani zôr sogllim amchim magnnim To aikota mhonn ami zannonv, tôr jem ami Tachê lagim maglam, tem amkam mell’llem mhonn amkam khatri asa.
16
Jim konn aplo bhav vô bhoinn mornnant rigoun dovrina toslem patok korta mhonn polletit, tãnnim tea bhava vô bhoinni khatir prarthon korchem ani oxem tanchê vorvim tea bhavak vô bhoinnik novean sangtam, mornnant rigoun dovrina toslem patok kortoleank Jivit melltolem. Mornnant rigoun dovorta toslem patok asa: oslem patok kortoleam khatir tumi prarthon korchem mhonn hanv sangina.
17
Koxê-i bhaxen vaitt korop mhollear patok, punn sogllim patkam mornnant rigoun dovortat toslim nhoi.
18
Jim konn Devachim bhurgim, tim patok korinant, punn Devacho Put tankam ballgun dovorta, ani Noxtteak tancher hat ghalunk koslich podvi na: hem ami zannonv.
19
Ami Devachim, ani ak’kho sonvsar Noxtteachea tabeant asa: hem-i ami zannonv.
20
Anink-ui ami zannonv: Devacho Put ailo ani Khorea Devak vollkhunk Tannem amkam vivêk dila. Hea Deva sovem ani Tachea Puta Jezu Krista sovem ami asanv. Hoch to khoro Dev ani Sasnnik Jivit.
21
Pritichea bhurgeamnô, kuddea devam thaun pois ravunk chotrai dhôrat.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.