Home

1Juanv Chapter 4 - Povitr Pustok Revised - 2010

1
Mhojea mogachea bhurgeamnô, Devachea Atmeachem preronn apnnak mell’llam, oxem sangtolea dor-ekleak mandun gheum nakat; punn him preronnam kosak lavun, khorench tim Devachea Atmea thaun ietat zalear polleiat, karonn zaite fottkire provadi sonvsarant ailole asat:
2
Devachea Atmeachea preronna vorvim êk sondêx ieta zalear, hachê voilean to tumi vollkhunk xoktat: Jezu mon’xa-soimbant ail’lo Krist mhonn mandun gheta to sogllo sondêx Deva thaun ieta;
3
ani zo sondêx Jezuk oso mandun ghena, to Deva thaun iena: oslo sondêx Kristachea virodhiacho. Ho Kristacho virodhi ieuncho asa mhonn tumi aikol’lem; khorench mhollear, atam legun to sonvsarant ail’lo asa.
4
Supurlea bhurgeamnô, tumi Devachim ani tancher, fottkirea provadiancher, tumi zoit vhelam. Karonn Zo tumchê sovem asa, To sonvsarant asa tachê poros odik bollixtt.
5
Te zalear sonvsarantle; dekhun sonvsarachi bhas te uloitat ani sonvsar tanchem aikota.
6
Punn ami, Jezuche sakxidar, Devache: jim konn Devak vollkhotat, tim amchem aikun ghetat; jim konn Devachim nhoi, tim amkam kan dinant. Hachêch vorvim konnacho sondêx sotacho ani konnacho fottkiro to ami vollkhunk xoktanv.
7
Mhojea opurbaiechea bhurgeamnô, eka-mekacho môg korum-ia, kiteak môg mhollear Deva koddchoch ani jim konn môg kortat, tim Deva thaun zolmoleant ani Devak vollkhotat.
8
Jim konn môg korinant, tankam Devachi vollokh mellunk na, kiteak Dev mhollear Môguch!
9
Aplea ekleach Puta vorvim amkam Jivit mellchê khatir Devan Taka sonvsarant dhaddlo: hantum Dev amcho môg korta mhonn ugddapem zalem.
10
Hanv môg mhonnttam to ho: ami Devacho môg kela to nhoi, punn Tannem amcho môg kelo to, amchim patkam nattak korunk boli koso Aplea Putak dhaddun môg dakoilo to.
11
Mhojea pritichea bhurgeamnô, Devan zôr amcho itlo môg kelo, ami-i eka-mekacho môg korunk zai.
12
Devak konnench kodinch polleunk na. Punn ami eka-mekacho môg kelo zalear, Dev amchê sovem jieta ani Tacho môg amchê sovem sompadnnek pavla.
13
Tannem Aplo Atmo amkam dila: hê khunnê vorvim ami Tachê sovem jietanv ani To amchê sovem jieta mhonn amkam kollon ieta.
14
Bapan Aplea Putak sonvsaracho Tarôk koso dhaddlo mhonn ami amchea dolleamnim pollelam ani hachi ami govai ditanv.
15
Jim konn Jezu Devacho Put mhonn mandun ghetat, tanchê sovem Dev jieta ani tim Deva sovem jietat.
16
Dev amcho môg korta, ho môg ami vollkhun ghetla ani tacher ami bhavarth tthevla. Dev mhollear Môguch! Jim konn mogant jietat, tim Deva sovem jietat ani Dev tanchê sovem jieta.
17
Zhôddtechea Disak purnn visvasan ami ravchê khatir amchê sovem môg sompadnnek pavlo: karonn hea sonvsarant-sun ami Jezu sarkim zaleanv.
18
Môg asa thõi bhirant na; portench, sopurnn môg bhirant pois korta; kiteak zõi khast asum-iet, thõi bhirant asa; ani zaka bhem dista, tacho môg sompadnnek pavunk na.
19
Tannem poilo amcho môg kelo dekhun, ami-i môg korum-ia.
20
Hanv Devacho môg kortam, oxem konn mhonntit, punn aplea bhavacho vô bhoinnicho dvês kortit zalear, him mon’xam fottkirim: apunn dekhtat tea bhavacho vô bhoinnicho tim môg korinant zalear, apnnem polleunk na tea Devacho koxim mhonn tim môg kortolim?
21
Khorem, Tachê koddchi ami ghetlea ti adnia hi: jim konn Devacho môg kortat, tãnnim aplea bhavam-bhoinnincho-i môg korcho.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.